By Protestat qytetare që nisën në Shqipëri kanë kaluar tashmë kufijtë kombëtarë, duke mobilizuar edhe shqiptarët që jetojnë jashtë vendit. Një tjetër tubim është zhvilluar në Bolonja të Italisë, ku dhjetëra pjesëtarë të diasporës shqiptare dolën në mbështetje të kauzave të ngritura nga protestuesit në Shqipëri.
Protesta ka tërhequr vëmendjen edhe të mediave italiane. Media lokale “Bologna Today” i ka kushtuar një raportim aktivitetit, duke intervistuar pjesëmarrës dhe duke pasqyruar motivet që i kanë nxitur ata të bashkohen me lëvizjen.
Mes protestuesve ishte edhe Detjon Begaj, i cili deklaroi se lëvizja nuk është e drejtuar vetëm kundër qeverisë aktuale, por kundër të gjithë klasës politike që ka dominuar jetën publike shqiptare ndër vite.
“E gjithë diaspora shqiptare po proteston, kryesisht për Lagunën e Nartës. Kjo lëvizje është zgjeruar, kundër korrupsionit dhe për të drejtat civile. Ndaj jemi pjesë e kësaj lëvizjeje për të mbështetur vendin tonë. Është një lëvizje kundër Ramës dhe Berishës”, u shpreh ai për median italiane.
Sipas pjesëmarrësve, protesta që nisi si reagim ndaj zhvillimeve në zonën e Nartës dhe Zvërnecit është shndërruar gradualisht në një lëvizje më të gjerë qytetare, ku ngrihen shqetësime që lidhen me korrupsionin, mbrojtjen e mjedisit, të drejtat civile dhe funksionimin e institucioneve.
Tubimi në Bolonja është një ndër disa aktivitetet e organizuara nga diaspora shqiptare në vende të ndryshme të Europës, duke treguar se jehona e protestave në Shqipëri po gjen mbështetje edhe përtej kufijve të vendit.
