By Një ngjarje e pazakontë është regjistruar gjatë kësaj jave në vilën e ish-futbollistit të njohur gjerman Mehmet Scholl në Mynih, ku një 48-vjeçar ka hyrë pa leje në banesë dhe ka shkaktuar shqetësim serioz për familjen.
Sipas raportimeve të mediave gjermane, autori dyshohet se ka hyrë në vilë rreth orës 05:00 të mëngjesit përmes një dritareje, ndërsa familja ishte në gjumë. Ai më pas ka përdorur ambientet e shtëpisë, duke bërë dush dhe duke ngrënë mëngjes, përpara se të ngjitej në katin ku ndodhej vajza 20-vjeçare e Scholl-it, e cila ishte në dhomë me partnerin e saj, futbollistin e TSV 1860 Munich, Sandro Porta.
Ngjarja është zbuluar kur personi ka tentuar të futet në shtrat pranë tyre, duke i zgjuar dhe duke shkaktuar përplasje fizike, siç është raportuar nga vajza e ish-futbollistit.
Sipas dëshmive, ajo dhe partneri i saj e kanë neutralizuar personin deri në mbërritjen e policisë. Edhe vetë Scholl është zgjuar nga zhurmat dhe ka ndërhyrë për të mbrojtur familjen e tij.
Autoritetet gjermane bëjnë me dije se i dyshuari, një shtetas gjerman nga rajoni i Misbahut, kishte probleme të njohura të shëndetit mendor. Ai është arrestuar dhe më pas është dërguar në një qendër të specializuar për trajtim psikiatrik.
Policia po vijon hetimet për të sqaruar plotësisht rrethanat e hyrjes së tij në banesë dhe sjelljen e tij brenda vilës.
