By Ajo që po ndodh sot në qarkun e Korçës nuk është thjesht një proces rutinë votimi brenda Partisë Demokratike. Është një tregues i qartë i krizës së thellë që ka përfshirë opozitën shqiptare dhe sidomos strukturat e saj në juglindje të vendit. Numrat e pjesëmarrjes, heshtja e strukturave, mungesa e entuziazmit dhe klima e përgjithshme politike flasin më shumë se çdo deklaratë publike apo propagandë e ardhur nga Tirana.
Edhe pse procesi është zhvilluar në qetësi dhe pa tensione të dukshme, kjo nuk lidhet me një organizim model apo me një unitet të brendshëm të Partisë Demokratike. Përkundrazi, qetësia duket si pasojë e një indiference të madhe dhe e një braktisjeje të heshtur nga vetë demokratët. Udhëzimet e ardhura nga drejtuesit qendrorë duket se kanë pasur si synim shmangien e konflikteve publike dhe ruajtjen e një fasade normaliteti, por realiteti në terren tregon diçka krejt tjetër.
Shifrat e pjesëmarrjes deri në orën 14:00 janë alarmante për një forcë politike që pretendon të jetë alternativa kryesore opozitare në vend.
* Në Korçë, nga rreth 5 mijë anëtarë të regjistruar, kanë votuar vetëm rreth 200 persona.
* Në Maliq situata paraqitet edhe më dramatike: nga 1835 anëtarë, vetëm 50 kanë marrë pjesë në votim.
* Në Kolonjë, ku dega e PD-së numëron rreth 1000 anëtarë, kanë votuar vetëm 30 persona dhe sipas burimeve nuk pritet të ketë lëvizje të mëtejshme deri në mbylljen e procesit.
* Në Devoll janë paraqitur rreth 150 votues nga mbi 1500 anëtarë,
* Në Pogradec vetëm 60 persona nga rreth 1200 anëtarë në listë.
Këto shifra nuk mund të interpretohen thjesht si lodhje politike apo mungesë organizimi. Ato përbëjnë një mesazh të drejtpërdrejtë ndaj drejtimit aktual të Partisë Demokratike dhe veçanërisht ndaj linjës Berisha-Noka. Demokratët në Korçë duket se kanë zgjedhur të mos përfshihen në një proces që e konsiderojnë të paracaktuar, të kontrolluar dhe pa asnjë ndikim real në të ardhmen e partisë.
Në këtë situatë, pyetja kryesore nuk është më se kush do të fitojë procesin, por sa legjitimitet do të ketë rezultati final. Pikërisht këtu lind edhe dyshimi më i madh politik. Brenda strukturave të komisioneve të votimit flitet hapur për mundësinë që nga Tirana të jepen udhëzime për “mbushjen” e kutive me qëllim krijimin artificial të një pjesëmarrjeje më të lartë. Një veprim i tillë, nëse ndodh, do të synonte vetëm fshehjen e realitetit të hidhur që po përjeton sot Partia Demokratike në qarkun e Korçës.
Dërgimi me urgjencë nga Tirana i koordinatorit Besnik Dervishi shihet si një tjetër tregues i shqetësimit të madh në selinë qendrore të PD-së. Ndërkohë, mungesa e drejtuesit politik Ivi Kaso në Korçë nuk ka kaluar pa u komentuar. Pas përplasjes së fortë që ai pati pak ditë më parë me deputetin Fidel Kreka në selinë e PD-së, duket qartë se konfliktet e brendshme kanë arritur një pikë kritike. Përplasja për zgjedhjen e kryetarit të ardhshëm të degës së PD Korçë ka nxjerrë në sipërfaqe ndarjet e forta dhe mungesën e kontrollit politik brenda strukturave lokale.
Roli i Fidel Krekës në këtë proces mbetet po ashtu kontradiktor. Zyrtarisht ai paraqitet si vëzhgues, por burime të ndryshme flasin për angazhimin e tij në mobilizimin e individëve që nuk janë anëtarë të Partisë Demokratike, me qëllim ndikimin dhe legjitimimin e proceseve të ardhshme sipas interesave personale dhe grupore. Nëse këto pretendime rezultojnë të vërteta, atëherë kriza e PD-së nuk është vetëm krizë pjesëmarrjeje, por edhe krizë besimi dhe morali politik.
Në Devoll, situata paraqitet disi ndryshe për shkak të ndikimit të deputetit Bledjon Nallbati, i cili pritet t’i ofrojë Sali Berishës një rezultat më të pranueshëm. Megjithatë, edhe kjo mbështetje duket më shumë si produkt i kontrollit lokal dhe strukturave të ngritura ndër vite sesa një reflektim i një fryme të re politike brenda Partisë Demokratike.
Nga ana tjetër, figura të tjera politike si Ledina Alolli kanë zgjedhur të mbajnë një profil distancues gjatë gjithë procesit. Edhe pse publikisht është deklaruar si e angazhuar, mungesa e saj në terren dhe distancimi faktik nga organizimi i procesit janë interpretuar si shenjë të shkëputjes së saj me strukturat lokale por edhe me bazën demokrate. Në ambientet e PD-së në Korçë flitet hapur se rezultati final nuk do të prodhohet nga baza, por nga urdhërat e drejtuesve qëndrore.
Në fund, ajo që mbetet më shqetësuese për Partinë Demokratike nuk është vetëm pjesëmarrja e ulët. Problemi më i madh është humbja e besimit tek demokratët e zakonshëm. Kur anëtarësia refuzon të marrë pjesë, kur strukturat janë të përçara dhe kur gjithçka perceptohet si proces formal pa garë reale, atëherë kriza bëhet ekzistenciale.
Qarku i Korçës ka qenë historikisht një territor i rëndësishëm politik për të djathtën shqiptare. Sot, ajo që po ndodh aty mund të lexohet si një paralajmërim serioz për të ardhmen e Partisë Demokratike në nivel kombëtar. Nëse drejtuesit aktualë vazhdojnë të injorojnë sinjalet që vijnë nga baza, atëherë braktisja e sotme mund të kthehet nesër në shpërbërje të plotë politike.
Teatri i rradhës pritet të ndodhë në orët në vijim.
