By Elisa Spiropali ka hedhur poshtë spekulimet për një largim të mundshëm nga Partia Socialiste, duke deklaruar se beteja e saj politike do të vijojë brenda radhëve të PS.
Në një prononcim për mediat para nisjes së seancës plenare, Spiropali u shpreh e vendosur se mbetet pjesë e Partisë Socialiste dhe se angazhimi i saj politik nuk ndryshon.
“Unë jam në PS, kam qenë në PS dhe do të jem gjithmonë në PS,” deklaroi ajo, duke theksuar se në parti duhet të jenë të gjithë ata që kërkojnë një “Shqipëri më të mirë”.
Ajo shtoi se po vijon punën për draftin e saj të quajtur “Shqipëria e Re”, një nismë që synon, sipas saj, ndryshime në mënyrën e funksionimit të shtetit dhe politikës, përmes forcimit të institucioneve, rritjes së garës politike dhe një sistemi më përfaqësues.
Deklarata e saj vjen në një moment tensionesh të dukshme brenda Partisë Socialiste, ku marrëdhëniet me kryeministrin Edi Rama janë shoqëruar me dallime të theksuara në qëndrime dhe debat publik.
Sipas deklarimeve të mëparshme, Spiropali ka kritikuar funksionimin e brendshëm të partisë dhe nevojën për më shumë debat dhe hapje ndaj mendimit ndryshe, ndërsa ka artikuluar idenë e një “marrëveshjeje të re politike” për vendin.
Në deklaratën e sotme, ajo nuk dha detaje të reja mbi përmbajtjen apo afatin e prezantimit të draftit “Shqipëria e Re”, por konfirmoi se puna për të vijon.
