By Finalet e NBA-së kanë sjellë një nismë të pazakontë dhe plot humor në Nju Jork. Kryebashkiaku i qytetit, Zoran Mamdani, ka firmosur simbolikisht një urdhër ekzekutiv që “shfuqizon” orarin e gjumit për fëmijët, në mënyrë që tifozët e vegjël të mund të ndjekin ekipin e tyre të zemrës deri në fund të ndeshjeve finale.
Nisma vjen mes diskutimeve të vazhdueshme për oraret e eventeve të mëdha sportive, të cilat shpesh planifikohen në kohët me audiencën më të lartë televizive. Edhe finalet e këtij viti në NBA do të nisin në orën 20:30 sipas kohës së Bregut Lindor, duke e bërë të vështirë për shumë fëmijë dhe adoleshentë ndjekjen e tyre deri në përfundim.
I rrethuar nga nxënës në zyrën e tij, Mamdani nënshkroi dokumentin humoristik ku thuhej se “koha e gjumit nuk duhet t’i pengojë njujorkezët e rinj të mbështesin Knicks dhe të shikojnë çdo sekondë të kësaj serie historike finalesh”. Për të theksuar karakterin satirik të nismës, dokumenti ishte hartuar madje me fontin Comic Sans.
“Si kryetar bashkie, ju duhet të merrni shumë vendime të vështira. Ky nuk ishte një prej tyre”, deklaroi ai me humor gjatë ceremonisë.
Megjithatë, urdhri mbetet krejtësisht simbolik dhe nuk sjell ndryshime për shkollat. Nxënësit që do të ndjekin finalet mes New York Knicks dhe San Antonio Spurs do të duhet të paraqiten normalisht në mësim. Shkollat publike të Nju Jorkut do të vijojnë aktivitetin deri më 26 qershor, ndërsa seria finale zhvillohet nga 3 deri më 19 qershor.
Ndërkohë, tifozët e rinj të Spurs në San Antonio e kanë më të lehtë të ndjekin ndeshjet, pasi pushimet verore në qytet kanë nisur që në fund të muajit maj.
