By Pas Francës, Polonisë dhe Mbretërisë së Bashkuar, edhe Italia ka vendosur të anulojë koncertin e reperit amerikan Kanye West, për shkak të polemikave të vazhdueshme lidhur me deklaratat e tij antisemitike.
Koncerti ishte planifikuar të zhvillohej në korrik në qytetin Reggio Emilia, por u anulua pas kërkesës së komunitetit hebre lokal. Drejtuesja e komunitetit, Nicoletta Uccelli, u bëri thirrje autoriteteve që ngjarja të zëvendësohej me një aktivitet që promovon muzikën si mjet bashkimi dhe mirëkuptimi.
Prefekti i zonës, Salvatore Angieri, tha se vendimi u mor duke marrë në konsideratë disa faktorë, përfshirë anulimet e mëparshme të koncerteve të artistit në vende të tjera dhe mundësinë e protestave kundërshtuese.
Megjithëse muajt e fundit Kanye West ka kërkuar falje publike ndaj komunitetit hebre për deklaratat e tij të mëparshme, polemikat vazhdojnë të ndikojnë në karrierën e tij artistike.
Reperi kishte planifikuar një turne botëror për promovimin e albumit të ri Bully, por një sërë koncertesh janë anuluar. Mes tyre përfshihen edhe tri netët e planifikuara në Wireless Festival, si dhe performancat në Zvicër, Poloni dhe Francë.
Në Mbretërinë e Bashkuar, autoritetet i ndaluan hyrjen në vend artistit, çka çoi në anulimin e paraqitjes së tij në festival. Kryeministri Keir Starmer mbështeti vendimin, duke theksuar angazhimin e qeverisë në luftën kundër antisemitizmit.
Edhe në Zvicër u anulua koncerti i planifikuar në stadiumin St. Jakob-Park. Ndërkohë, FC Basel deklaroi se organizimi i koncertit nuk ishte në përputhje me vlerat e institucionit.
Polonia anuloi koncertin e parë të Kanye West pas 15 vitesh në Silesian Stadium. Ministrja e Kulturës, Marta Cienkowska, e cilësoi të papranueshme organizimin e një koncerti nga një artist që ka shprehur publikisht pikëpamje antisemitike dhe admirim për Adolf Hitler.
Në Francë, koncerti i planifikuar në Marseille më 11 qershor është shtyrë pa afat.
Ndryshe nga shumica e vendeve evropiane, Holanda nuk ka gjetur bazë ligjore për t’i ndaluar hyrjen reperit. Si rezultat, dy koncertet e planifikuara në arenën GelreDome pritet të zhvillohen sipas planit më 6 dhe 8 qershor. Zëvendëskryeministri holandez Bart van den Brink deklaroi se deklaratat e mëparshme të artistit nuk përbëjnë aktualisht arsye të mjaftueshme ligjore për t’i ndaluar hyrjen në vend.
