By Allison Guerriero, ish-partnerja e Charles McGonigal, ish-drejtorit të zyrës së kundërzbulimit të FBI-së në Nju-Jork, është gjetur e vdekur. Guerriero kishte denoncuar më herët pranë autoriteteve amerikane disa prej aktiviteteve të McGonigal, duke u bërë një prej personave me rol të rëndësishëm në hetimet që pasuan ndaj ish-zyrtarit të lartë të FBI-së.
Vdekja e saj rikthen në vëmendje dosjen e bujshme McGonigal, e cila shkaktoi jehonë të madhe edhe në Shqipëri. McGonigal u dënua në Shtetet e Bashkuara për shkelje të sanksioneve ndaj Rusisë dhe për fshehjen e pagesave që kishte marrë nga një ish-punonjës i shërbimeve të inteligjencës shqiptare.
Emri i Allison Guerrieros u bë veçanërisht i njohur në Shqipëri për shkak të të dhënave që ajo u përcolli autoriteteve amerikane pas përfundimit të marrëdhënies së saj me McGonigal. Sipas deklarimeve të saj publike, ajo u kishte dhënë hetuesve informacione mbi aktivitetet e ish-zyrtarit të FBI-së, përfshirë edhe kontaktet e tij me kryeministrin shqiptar, Edi Rama.
Guerriero kishte deklaruar se McGonigal i kishte treguar se do të udhëtonte drejt Shqipërisë për t’u takuar me Edi Ramën, edhe pse nuk i kishte shpjeguar qëllimin konkret të këtyre takimeve.
Në dëshmitë e bëra publike, ajo kishte pretenduar gjithashtu se McGonigal dhe Rama kishin krijuar një marrëdhënie personale dhe se ish-zyrtari i FBI-së fliste shpesh për kryeministrin shqiptar.
Deklarimet e Guerrieros morën rëndësi të veçantë pas publikimit të aktakuzës amerikane ndaj McGonigal, ku kryeministri Edi Rama përmendej në disa pjesë të dokumentit zyrtar.
Vdekja e Guerrieros pritet të rikthejë vëmendjen te roli i saj në hetimet amerikane dhe te informacionet që ajo u kishte dhënë autoriteteve lidhur me aktivitetet e ish-zyrtarit të FBI-së.
