By Një vendim i një gjykate federale në Uashington ka njohur të drejtën e kompanisë “Omni Bridgeway” për të ndjekur procedurat e ekzekutimit të një arbitrazhi ndërkombëtar në vlerën rreth 13 milionë dollarë ndaj shtetit shqiptar.
Sipas dokumenteve të cituara nga media, çështja lidhet me një vendim arbitrazhi në favor të kompanisë GBC Oil, një firmë me pronarë shqiptarë dhe amerikanë, në një konflikt që zgjat prej gati një dekade mbi koncesione në sektorin e naftës në Shqipëri.
Vendimi i gjykatës amerikane i jep mundësi palës paditëse të kërkojë masa për ekzekutimin e detyrimit financiar, përfshirë edhe konfiskimin e aseteve shqiptare jashtë vendit, në rast mospagese të shumës së përcaktuar nga arbitrazhi.
Çështja buron nga një mosmarrëveshje për kontrata koncesionare të fushave të naftës dhe ndryshime fiskale të aplikuara nga shteti shqiptar, të cilat sipas palës private kanë sjellë dëm ekonomik. Pas shtetëzimit të mëvonshëm të aseteve, kompania iu drejtua arbitrazhit ndërkombëtar, duke kërkuar fillimisht mbi 100 milionë dollarë dëmshpërblim, por gjykata i dha një pjesë të kërkesës, duke vendosur rreth 12.7–13 milionë dollarë kompensim.
Sipas raportimeve, dokumentet e vendimit janë dorëzuar disa herë autoriteteve shqiptare dhe janë pranuar zyrtarisht në vitin 2025, ndërsa pretendohet se institucionet përkatëse nuk kanë reaguar në kohë.
Çështja pritet të vijojë në fazën e ekzekutimit, e cila mund të ketë pasoja financiare për asetet shtetërore shqiptare jashtë vendit, në varësi të zhvillimeve të mëtejshme ligjore.
