By Një ngjarje e rëndë ka tronditur Times Square në Nju Jork, ku një grua ka sulmuar me thikë dy persona, duke shkaktuar vdekjen e njërit prej tyre dhe plagosjen e rëndë të tjetrit. Autorja e dyshuar u qëllua për vdekje nga policia pas përplasjes me efektivët.
Ngjarja ndodhi pasditen e së hënës, pranë kryqëzimit të 41st Street me Seventh Avenue, në një prej zonave më të frekuentuara të Manhatanit. Sipas autoriteteve, sulmi ishte i rastësishëm dhe i paprovokuar, ndërsa dy personat u goditën me thikë brenda një intervali prej rreth 20 sekondash.
Viktima e parë ishte një 68-vjeçar, i cili sapo kishte dalë nga metroja dhe po priste të kalonte rrugën së bashku me bashkëshorten e tij. Sipas policisë, gruaja nxori dy thika nga një çantë dhe e goditi atë në bark, pa pasur ndonjë konflikt të mëparshëm me të.
Pas sulmit, autorja e dyshuar u largua në drejtim të Seventh Avenue dhe 42nd Street. Vetëm pak sekonda më vonë, ajo iu afrua një gruaje 32-vjeçare dhe e goditi edhe atë në bark, në një tjetër sulm të paprovokuar.
32-vjeçarja u transportua me urgjencë në spital, por plagët e marra rezultuan fatale dhe ajo ndërroi jetë. Ndërkohë, 68-vjeçari u dërgua në spital me plagë të rënda që rrezikonin jetën, por gjendja e tij më vonë u stabilizua.
Pas dy sulmeve, gruaja u largua nga vendi i ngjarjes dhe u drejtua në veri, në drejtim të një nënstacioni të policisë. Disa dëshmitarë njoftuan efektivët, të cilët arritën ta lokalizonin.
Policia e ka identifikuar të dyshuarën si Pamela Cisneros, 49 vjeçe, nga Queens. Sipas autoriteteve, ajo kishte një histori të dokumentuar të problemeve të shëndetit mendor.
Për rreth katër minuta, efektivët i kërkuan vazhdimisht gruas të hidhte thikat dhe të dorëzohej. Sipas komisioneres së NYPD-së, Jessica Tisch, ajo refuzoi t’u bindej urdhrave të policisë.
Gjatë përballjes, Cisneros dyshohet se kërcënoi efektivët, duke deklaruar se nuk do t’i hidhte thikat dhe se preferonte t’i vriste ata. Sipas autoriteteve, kërcënimet u përsëritën disa herë.
Efektivët përdorën fillimisht armët elektrike “Taser” në përpjekje për ta neutralizuar, por situata nuk u qetësua. Në vijim, dy oficerë të policisë hapën zjarr ndaj gruas.
Cisneros u plagos rëndë dhe u transportua në spital, ku më vonë u shpall e vdekur.
Në vendin e ngjarjes u gjetën dy thika, të cilat janë sekuestruar nga policia si prova materiale.
Autoritetet kanë bërë të ditur se, bazuar në informacionet paraprake, ngjarja nuk duket të ketë lidhje me terrorizmin. Hetuesit po punojnë për të përcaktuar motivin e sulmit dhe për të zbardhur plotësisht rrethanat e ngjarjes.
Kryebashkiaku i Nju Jorkut, Zohran Mamdani, ka vlerësuar reagimin e policisë, duke deklaruar se ndërhyrja e shpejtë e efektivëve parandaloi që situata të përshkallëzohej më tej në një prej zonave më të frekuentuara të qytetit.
