By Thashethemet rreth dasmës së Taylor Swift dhe Travis Kelce po vazhdojnë të qarkullojnë, ndërsa së fundmi është zbuluar edhe një rregull i vendosur nga çifti për të ftuarit.
Zbulimi është bërë nga lojtari i San Francisco 49ers, George Kittle, mik i ngushtë i atletit, i cili ka konfirmuar se të ftuarve u është kërkuar të mos sjellin dhurata në ceremoni.
“Na thanë shumë qartë: asnjë dhuratë,” është shprehur Kittle për Extra TV gjatë eventit “Tight Ends and Friends” në Nashville.
Ai shtoi me humor se mund të mos e respektojë plotësisht këtë kërkesë, duke përmendur se Kelce ka një pëlqim të veçantë për monedhat e vjetra. “Ndoshta do t’i blej një monedhë të rrallë,” tha ai.
Sipas deklarimeve, Kittle pritet të jetë gjithashtu i pranishëm në dasmë dhe i ka uruar çiftit të shijojë periudhën para ceremonisë.
Taylor Swift dhe Travis Kelce u fejuan në gusht të vitit 2025, ndërsa ende nuk kanë bërë publike datën zyrtare të dasmës së tyre.
Në muajt e fundit kanë qarkulluar disa skenarë për kohën dhe vendin e mundshëm të ceremonisë, përfshirë datën 13 qershor dhe periudhën e Ditës së Pavarësisë në SHBA. Gjithashtu, janë përmendur edhe raporte që e lidhin eventin me Madison Square Garden në New York, megjithatë pa asnjë konfirmim zyrtar.
Deri tani, çifti vijon t’i mbajë detajet e dasmës larg vëmendjes së publikut, duke rritur edhe më shumë kuriozitetin e fansave.
