By NASA ka nisur në hapësirë teleskopin e saj të ri dhe të fuqishëm, “Nancy Grace Roman”, në një mision ambicioz që synon të hedhë dritë mbi disa prej mistereve më të mëdha të Universit, përfshirë energjinë e errët, vrimat e zeza dhe planetët jashtë sistemit tonë diellor.
Teleskopi u nis nga një platformë lëshimi në Florida dhe do të udhëtojë për rreth 100 ditë drejt pozicionit të tij të vëzhgimit, afërsisht një milion milje larg Tokës. Pasi të arrijë në destinacion, ai do të nisë një program të gjerë vëzhgimesh astronomike, duke hartuar zona të mëdha të hapësirës dhe duke kërkuar ekzoplanete të rinj.
Një nga veçoritë kryesore të teleskopit “Roman” është fusha e tij e gjerë e shikimit. Ai do të jetë në gjendje të fotografojë zona të hapësirës të paktën 100 herë më të mëdha se ato që mund të vëzhgojë teleskopi i famshëm hapësinor Hubble. Kjo do t’u mundësojë shkencëtarëve të studiojnë një numër shumë më të madh yjesh dhe galaktikash në një kohë shumë më të shkurtër.
“Roman do ta ndryshojë mënyrën se si e shikojmë Universin”, deklaroi administratorja e NASA-s, Nicky Fox, duke theksuar potencialin e misionit për zbulimin e mijëra planetëve të rinj. Sipas saj, teleskopi mund të identifikojë dhjetëra mijëra dhe ndoshta deri në 100 mijë ekzoplanete të reja.
Një tjetër objektiv i rëndësishëm i misionit është studimi i energjisë së errët, një prej mistereve më të mëdha të kozmologjisë moderne. Shkencëtarët besojnë se kjo formë misterioze energjie lidhet me zgjerimin e përshpejtuar të Universit, por natyra e saj mbetet ende e panjohur.
Teleskopi do të përdoret gjithashtu për të studiuar vrimat e zeza dhe evolucionin e galaktikave, duke u dhënë astronomëve një pamje më të gjerë të mënyrës se si është formuar dhe si ka ndryshuar Universi gjatë miliarda viteve.
Në konferencën e NASA-s pas nisjes, Presidenti i Shteteve të Bashkuara, Donald Trump, u lidh përmes videokonferencës për të përshëndetur shkencëtarët dhe ekipet që kanë punuar në projekt.
“Ju jeni më të mirët në hapësirë dhe ne kemi vendin më të mirë kudo në botë. Pra, le ta vazhdojmë të gjithë këtë. Ju jeni një pjesë e madhe e saj”, tha Trump.
Teleskopi mban emrin e Nancy Grace Roman, astronomes që konsiderohet një prej figurave themeluese të programit hapësinor shkencor të NASA-s. Roman ishte astronomja e parë kryesore e agjencisë amerikane në vitet 1960 dhe luajti një rol të rëndësishëm në zhvillimin e programeve që çuan më vonë edhe në krijimin e teleskopit Hubble.
Me teknologjinë e tij të avancuar dhe aftësinë për të vëzhguar një pjesë shumë më të gjerë të qiellit, teleskopi “Nancy Grace Roman” pritet të hapë një kapitull të ri në astronomi. Misioni synon jo vetëm të zbulojë botë të reja jashtë sistemit tonë diellor, por edhe të ndihmojë shkencëtarët të kuptojnë më mirë origjinën, strukturën dhe të ardhmen e Universit.
