By Gjykata e Posaçme Kundër Korrupsionit dhe Krimit të Organizuar (GJKKO) ka shpallur të pafajshme kryebashkiaken e Roskovecit, Majlinda Bufi, e cila ishte marrë e pandehur nga SPAK për akuzën e përdorimit të funksionit publik për veprimtari politike.
Vendimi është dhënë nga gjyqtarja Irena Gjoka, e cila në arsyetimin e saj theksoi se gjatë shqyrtimit gjyqësor nuk u provua që Bufi të kishte kryer veprën penale për të cilën akuzohej.
Majlinda Bufi është hetuar dhe gjykuar në gjendje të lirë gjatë gjithë procesit. Më herët, Prokuroria e Posaçme (SPAK) kishte kërkuar dënimin e saj me 1 vit e 6 muaj burg, i cili në rast të gjykimit të shkurtuar do të reduktohej në 1 vit burg, si dhe pezullimin e ekzekutimit të dënimit me vendosjen në shërbim prove për dy vite.
Megjithatë, GJKKO vendosi rrëzimin e kërkesës së prokurorisë dhe shpalljen e pafajësisë për kryebashkiaken e Roskovecit.
