By Një aksident i rëndë rrugor është regjistruar në mëngjesin e së enjtes në Nafpaktos, pranë Sheshit të Portit, ku një automjet ka dalë nga kontrolli dhe ka shkaktuar dëme të shumta materiale.
Sipas mediave greke, drejtuesi i mjetit ka humbur kontrollin në një kthesë për arsye ende të paqarta. Automjeti është ngjitur në trotuar dhe ka përshkuar me shpejtësi një zonë të frekuentuar me lokale, duke goditur tavolina, karrige dhe disa biçikleta të parkuara.
Pamjet e publikuara nga mediat lokale tregojnë momentin dramatik kur makina lëviz në mënyrë të pakontrolluar në zonën e banuar dhe të frekuentuar. Në sekondat vendimtare, një grua që sapo kishte parkuar automjetin e saj arrin të largohet me shpejtësi duke marrë me vete një fëmijë, duke shmangur një tragjedi të mundshme. Mjeti më pas përplaset me automjetin e saj dhe me një tjetër makinë të parkuar.
Raportohet se automjeti drejtohej nga një i moshuar, i cili po udhëtonte nga zona e Lagadoulës drejt portit të Nafpaktosit. Gjatë lëvizjes së pakontrolluar, makina ka kaluar edhe në korsinë e kundërt të qarkullimit përpara se të përfundonte në trotuar.
Si pasojë e aksidentit, një person ka mbetur i lënduar lehtë dhe ka marrë ndihmën e parë nga ekipet mjekësore që mbërritën menjëherë në vendngjarje. Policia rrugore ka nisur hetimet për të zbardhur rrethanat e plota të incidentit.
Autoritetet theksojnë se zona ku ndodhi aksidenti është një prej pikave më të frekuentuara të qytetit, ndërsa fatmirësisht bilanci i ngjarjes nuk ka qenë fatal, pavarësisht rrezikut të madh për kalimtarët.
