By Media britanike prestigjioze Sky News i ka kushtuar një artikull protestës së fundit në Tiranë, duke u fokusuar te përplasjet mes protestuesve dhe forcave të rendit.
Sipas raportimit, gjatë protestës para Kuvendit të Shqipërisë, policia përdori gaz lotsjellës, sprej me piper dhe topa uji për të shpërndarë turmën, pasi disa protestues hodhën gurë, vezë dhe shishe plastike në drejtim të efektivëve.
Autoritetet raportuan se 12 policë u plagosën, ndërsa 18 protestues u ndaluan gjatë ndërhyrjes.
Demonstrata është pjesë e një vale protestash të përditshme të njohura si “Revolucioni i Flamingove”, e cila nisi mbi një muaj më parë si kundërshtim ndaj një projekti zhvillimi luksoz në Lagunën e Nartës, në bregdetin shqiptar të Adriatikut.
Aktivistët pretendojnë se projekti rrezikon habitatet e shpendëve shtegtarë të mbrojtur, përfshirë flamingot, ndërsa protesta janë zgjeruar duke marrë karakter më të gjerë politik kundër kryeministrit Edi Rama dhe qeverisë së tij.
Në javët e fundit, mijëra qytetarë kanë dalë në rrugë, duke përdorur bilbila dhe figura kartoni të flamingove si simbol të lëvizjes. Gjatë protestës së fundit, disa qindra persona u mblodhën para parlamentit duke kërkuar dorëheqjen e kryeministrit dhe duke brohoritur slogane kundër tij.
Sipas raportimit, disa protestues dëmtuan një automjet policie duke përdorur pjesë të një barriere metalike, para se forcat e rendit të ndërhynin për shpërndarjen e turmës.
Një prej protestueseve, Agustela Thoma, u shpreh për Sky News se protestuesit kërkojnë që zëri i tyre të dëgjohet në parlament, duke theksuar se “mjaft është mjaft”.
Nga ana tjetër, qeveria shqiptare e ka mbrojtur projektin, duke argumentuar se ai do të sjellë zhvillim ekonomik, turizëm luksoz dhe do të ndihmojë procesin e integrimit të vendit në Bashkimin Evropian.
Ministri i Brendshëm, Besfort Lamallari, ka dënuar aktet e dhunës ndaj policisë, duke theksuar se sulmet ndaj efektivëve përbëjnë sulme ndaj shtetit dhe rendit publik.
