By Google ka forcuar udhëzimet për përmbajtjet në internet, duke vendosur në fokus përdorimin e autorëve të sajuar, biografive të rreme, kualifikimeve të pavërteta dhe fotografive të krijuara me inteligjencë artificiale për të krijuar një autoritet të rremë.
Sipas udhëzimeve të reja, profilet fiktive të autorëve dhe informacioni i rremë për përvojën apo ekspertizën e tyre konsiderohen praktika mashtruese. Faqet që përdorin metoda të tilla mund të përballen me ulje të dukshmërisë në rezultatet e Google Search.
Vendimi vjen në kuadër të përpjekjeve të Google për të favorizuar përmbajtje të dobishme dhe të besueshme, të krijuara për përdoruesit dhe jo për manipulimin e algoritmeve të kërkimit.
Në qendër të debatit është edhe një investigim i revistës “Futurism” mbi kompaninë Brown Brothers Media, e cila, sipas investigimit, kishte krijuar një rrjet faqesh me përmbajtje të prodhuara në mënyrë masive dhe të optimizuara për motorët e kërkimit. Në disa prej tyre shfaqeshin autorë që nuk ekzistonin realisht, me biografi dhe eksperienca profesionale të sajuara.
Rasti ka ngritur shqetësime më të gjera për mënyrën se si inteligjenca artificiale dhe automatizimi po përdoren për të prodhuar përmbajtje në internet, veçanërisht kur shoqërohen me identitete të rreme.
Google kërkon që faqet të ofrojnë informacion të qartë dhe të besueshëm mbi autorët e përmbajtjeve të tyre. Në këtë mënyrë, përdorimi i kredencialeve të rreme nuk shihet më thjesht si problem etik, por mund të ndikojë drejtpërdrejt edhe në pozicionimin e një faqeje në rezultatet e kërkimit.
Ndërkohë, masat kanë sjellë edhe kritika ndaj vetë Google, veçanërisht për përdorimin në rritje të përmbledhjeve të gjeneruara nga inteligjenca artificiale në rezultatet e kërkimit.
Me ndryshimet e fundit, Google po dërgon një sinjal të qartë te administruesit e faqeve: krijimi i autorëve fiktivë dhe përdorimi i kredencialeve të rreme për të fituar besueshmëri mund të kushtojë shtrenjtë në rezultatet e kërkimit.
