By Një gjykatë në Los Angeles ka vendosur se këngëtari amerikan Chris Brown mban përgjegjësi për një incident të ndodhur në vitin 2020, ku qeni i tij sulmoi një punonjëse shtëpiake, duke e urdhëruar të paguajë 13 milionë dollarë dëmshpërblim.
Vendimi u dha pas një gjyqi dyjavor, ku juria vendosi në favor të Maria Avilës, e cila kishte paditur artistin duke pretenduar se ai kishte treguar neglizhencë në menaxhimin e kafshës, duke lejuar që qeni i madh të lëvizte i lirë në ambientet e rezidencës.
Sipas dëshmisë së Avilës, ajo u sulmua nga qeni ndërsa po nxirrte mbeturinat. Ajo deklaroi se sulmi i shkaktoi plagë të rënda në fytyrë, duke i dëmtuar rëndë lëkurën, si dhe pasoja serioze shëndetësore, përfshirë humbje të shikimit në njërin sy dhe dëmtime nervore.
Gjatë procesit gjyqësor, Chris Brown argumentoi se qeni mbahej për arsye sigurie dhe nuk ishte kafshë shtëpiake. Ai po ashtu pretendoi se kishte paralajmëruar punonjësen të mos dilte në oborr pa praninë e rojeve të sigurisë, pasi qeni nuk ishte i sigurt për kontakt.
Nga ana tjetër, Maria Avila dhe motra e saj Patricia Avila mohuan se një paralajmërim i tillë ishte dhënë ndonjëherë.
Në gjykatë u bë e ditur gjithashtu se pas incidentit, këngëtari nuk kishte njoftuar autoritetet dhe nuk kishte ofruar ndihmë mjekësore, por ishte larguar nga vendngjarja.
Maria Avila fillimisht kishte kërkuar 90 milionë dollarë dëmshpërblim, ndërsa gjykata vendosi t’i akordojë 13 milionë dollarë. Motra e saj, Patricia Avila, u shpërblye gjithashtu me 885 mijë dollarë për dëmet e pësuara në lidhje me ngjarjen.
