By Protesta kombëtare ka hyrë sot në ditën e saj të 11-të, me qytetarët që pritet të mblidhen sërish në orën 18:00 në kryeqytet, pas tubimeve të një dite më parë që zgjatën deri në mesnatë.
Dje, nga ora 18:00 deri në 00:00, rrugët e Tiranës u mbushën me protestues që brohoritën dhe kërkuan dorëheqjen e kryeministrit Edi Rama, në një tubim të karakterizuar nga pjesëmarrje e lartë dhe thirrje të vazhdueshme politike.
Organizatorët kanë bërë të ditur se protesta do të vijojë çdo ditë, duke synuar mobilizim më të madh të qytetarëve, ndërsa i kanë bërë thirrje edhe diasporës shqiptare që të bashkohet në këtë lëvizje.
Sipas tyre, qëndrimi i protestuesve mbetet i pandryshuar: kërkesa për krijimin e një qeverie teknike të përbërë nga figura të pavarura dhe intelektualë, si dhe largimi i qeverisë aktuale.
Tubime në mbështetje të protestës janë zhvilluar edhe në disa shtete ku jeton diaspora shqiptare, duke reflektuar zgjerimin e saj jashtë kufijve të Shqipërisë.
Gjatë protestave janë dëgjuar thirrje të forta politike, ndërsa organizatorët deklarojnë se do të vijojnë aksionin deri në plotësimin e kërkesave të tyre.
