By E ardhmja e Ernest Muçi te Trabzonspor po hyn në një fazë vendimtare, teksa klubi turk ka afat deri më 10 maj për të vendosur nëse do të ushtrojë opsionin e blerjes së kartonit nga Beşiktaş JK.
Çdo lëvizje e mesfushorit ofensiv po ndiqet me vëmendje nga tifozët, sidomos në rrjetet sociale. Ndryshimi i fundit i fotos së profilit, ku Muçi ka hequr imazhin me fanellën e Trabzonsporit dhe ka vendosur një foto personale me vajzën e tij, është interpretuar si një sinjal i mundshëm largimi.
Aktualisht, lojtari i Kombëtares shqiptare është i huazuar deri në fund të sezonit. Nëse Trabzonspor vendos të mos e mbajë, atëherë Beşiktaş JK pritet të kërkojë një destinacion të ri për të.
Pavarësisht pasigurisë për të ardhmen, Muçi ka qenë një nga lojtarët më të rëndësishëm të sezonit për ekipin turk. Megjithatë, një dëmtim gjatë muajit prill e detyroi të mungojë në disa ndeshje, duke ndikuar në vazhdimësinë e tij në fushë.
