By Ilir Meta do të vijojë të qëndrojë në qeli, pasi Apeli i GJKKO ka rrëzuar kërkesën e tij për zbutjen e masës së sigurisë, pavarësisht ofertës për një garanci pasurore prej 50 mijë eurosh.
Në vendimin e Apelit të GJKKO thuhet se i pandehuri kishte kërkuar zëvendësimin e masës aktuale me alternativa më të lehta, si “arrest shtëpie”, garanci pasurore, detyrim për paraqitje në policinë gjyqësore ose ndalim të daljes jashtë vendit. Ankesa ishte paraqitur përmes mbrojtësit të tij ligjor, avokatit Kujtim Cakrani.
Sipas trupës gjykuese, nuk janë gjetur kushte të mjaftueshme për të ndryshuar masën e sigurisë në këtë fazë të procesit, duke lënë në fuqi vendimin e mëparshëm për mbajtjen në qeli të ish-zyrtarit të lartë.
Në vendim theksohet gjithashtu se palët do të njoftohen zyrtarisht, ndërsa ndaj këtij vendimi mbetet e hapur mundësia e ushtrimit të rekursit në Gjykata e Lartë.
Ky zhvillim vjen në kuadër të procesit gjyqësor ndaj Metës, ndërsa pritet që çështja të vijojë me hapa të tjerë procedurialë në sistemin e drejtësisë.
Vendimi i Apelit të GJKKO
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më datë 04.05.2026, shpalli vendimin mbi çështjen penale nr. 120 akti, datë 22.04.2026 regjistrimi, mbi ankimin e ankuesit I.M: “Ankim kundër vendimit nr. 242, datë 24.03.2026 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: zëvendësimin e masës së sigurimit personal të arrestit në burg, në një masë tjetër: arrest në shtëpi, garanci pasurore, detyrimi për t’u paraqitur në policinë gjyqësore, ose ndalimi i daljes jashtë shtetit” dhe vendosi:
– Mospranimin e ankimit të paraqitur nga i pandehuri I.M., nëpërmjet mbrojtësit av. Kujtim Cakrani, ndaj disponimit nr. 242, datë 24.03.2026 të Gjykatës së Posaçme të Shkallës së Parë për Korrupsionin dhe Krimin e Organizuar.
– Ky vendim t’i njoftohet palëve.
– Ndaj këtij vendimi mund të bëhet rekurs në Gjykatën e Lartë.
Tiranë, më 04.05.2026.
