By Autoriteti Rrugor Shqiptar ka hapur procedurën për ndërtimin e 6 mbikalimeve për këmbësorët përgjatë kilometrave të parë të autostradës Autostrada Tiranë–Durrës, si pjesë e fazës së dytë të projektit të zgjerimit të këtij aksi.
Sipas projektit, ndërhyrja synon të rrisë sigurinë rrugore dhe të lehtësojë lëvizjen e banorëve që jetojnë përgjatë autostradës, duke krijuar pika të dedikuara kalimi dhe duke reduktuar rrezikun nga qarkullimi i lartë i automjeteve.
Procedura e tenderimit pritet të përfundojë më 15 qershor, ndërsa pas shpalljes së fituesit, punimet do të nisin menjëherë në terren. Projekti përfshin jo vetëm ndërtimin e mbikalimeve, por edhe sistem ndriçimi, gjelbërim, barriera akustike dhe ndërhyrje të tjera infrastrukturore mbështetëse.
Mbikalimet do të vendosen në disa pika kyçe përgjatë aksit, përfshirë zonat pranë Yrshekut, Universitetit “Polis”, QTU-së, BRUNES, objektit të FedEx Albania dhe zonës pranë Autostar.
Sipas ARRSH-së, ky projekt është pjesë e përmirësimit të standardeve të sigurisë në një nga akset më të ngarkuara në vend, ku trafiku i lartë e ka bërë të domosdoshëm krijimin e infrastrukturës së dedikuar për këmbësorët.
Punimet pritet të përfundojnë brenda muajit shtator, në mënyrë që mbikalimet të jenë funksionale para nisjes së vitit të ri shkollor.
