By Klubi i Sevilla FC ka lëshuar një deklaratë të fortë publike kundër ish-lojtarit të tij, Sergio Ramos, duke e akuzuar për sjellje mashtruese në lidhje me negociatat e dështuar për blerjen e klubit.
Sipas deklaratës së shpërndarë në media, drejtuesit e Sevillas pretendojnë se bisedimet me Ramosin kishin avancuar deri në finalizim, por më 27 maj kushtet e marrëveshjes ndryshuan në mënyrë të papritur, duke sjellë dështimin e procesit. Klubi nënkupton se ky ndryshim mund të ketë qenë i qëllimshëm dhe i planifikuar paraprakisht.
Në letrën zyrtare, aksionarët e klubit shprehen se janë të gatshëm të ndërmarrin hapa ligjorë ndaj ish-kapitenit të tyre, duke kërkuar dëmshpërblim për dëmet e pretenduara nga prishja e negociatave.
Po ashtu, drejtuesit paralajmërojnë se çdo zbulim i informacionit konfidencial nga ana e Ramos gjatë paraqitjes së tij publike të planifikuar për këtë pasdite do të konsiderohet shkelje e marrëveshjeve të fshehtësisë dhe mund të pasohet nga veprime të mëtejshme ligjore.
Nga ana e tij, Sergio Ramos pritet të dalë para mediave për të sqaruar versionin e tij mbi dështimin e marrëveshjes dhe për të adresuar akuzat e ngritura nga klubi andaluzian.
Çështja ka tërhequr vëmendje të madhe në Spanjë, duke hapur një tjetër debat rreth marrëdhënieve mes figurave të njohura të futbollit dhe drejtimit të klubeve.
