By Kryeministri Edi Rama ka replikuar publikisht me zëdhënësin e Ministrisë së Jashtme të Iranit, Esmaeil Baqaei, lidhur me protestat e fundit në Tiranë, duke e akuzuar Teheranin për ndërhyrje dhe propagandë politike.
Në një postim në rrjetin social “X”, Rama shkruan se reagimi i zyrtarëve iranianë ndaj zhvillimeve në Shqipëri tregon, sipas tij, një përpjekje për të instrumentalizuar protestat qytetare.
Ai thekson se protestuesit në Shqipëri janë të lirë të shprehin pakënaqësitë e tyre pa frikë ndëshkimi, duke e konsideruar këtë një tregues të funksionimit demokratik të vendit.
“Ju citoni protestues shqiptarë që brohorasin në rrugë. Shumë mirë. Kjo quhet demokraci. Në Shqipëri njerëzit janë të lirë të protestojnë kundër qeverisë së tyre, të kritikojnë Kryeministrin, të kërkojnë drejtësi dhe të bëjnë thirrje për zgjedhje pa frikën e burgosjes. A mund të thuhet e njëjta gjë për njerëzit në emër të të cilëve pretendoni se flisni?”, shkruan Rama.
Kreu i qeverisë shton se është domethënëse, sipas tij, që autoritetet iraniane shfaqin shqetësim për protestat në Shqipëri, ndërsa akuzon regjimin në Teheran për shtypje dhe shkelje të të drejtave të njeriut.
Rama përmend gjithashtu, në reagimin e tij, përdorimin e “propagandës digjitale”, duke iu referuar profileve të rreme dhe përmbajtjeve të manipuluara online, të cilat sipas tij synojnë të krijojnë konfuzion publik.
“Populli shqiptar është mjaftueshëm inteligjent për të dalluar të vërtetën nga gënjeshtra”, shkruan ai, duke shtuar se asnjë formë propagande nuk mund të ndikojë në perceptimin e qytetarëve.
Deklarata e tij vjen në një moment tensionesh të rritura politike dhe debatit të gjerë publik mbi protestat e fundit në vend.
