By Autoritetet iraniane kanë kryer mbi 4 mijë arrestime të lidhura me konfliktin me Shtetet e Bashkuara dhe Izraelin, sipas një raporti të publikuar nga organizata për të drejtat e njeriut HRANA, me seli në SHBA.
Sipas raportit, janë regjistruar të paktën 4,023 arrestime në periudhën 28 shkurt – 9 maj, periudhë që përkon me përshkallëzimin e tensioneve dhe sulmeve amerikano-izraelite ndaj Iran. Personat e ndaluar akuzohen për spiunazh, kërcënim ndaj sigurisë kombëtare dhe shpërndarje materialesh të lidhura me konfliktin në media të huaja.
HRANA pretendon se autoritetet iraniane po përdorin situatën e luftës për të justifikuar arrestimet masive, kufizimin e lirisë së shprehjes dhe përdorimin e dhunës ndaj civilëve.
Nga ana tjetër, shefi i policisë iraniane, Ahmad Reza Radan, ka deklaruar se më shumë se 6,500 persona të konsideruar si “tradhtarë dhe spiunë” janë arrestuar që prej protestave antiqeveritare të janarit, duke i lidhur këto masa me aktivitete të cilësuara armiqësore ndaj shtetit.
Situata bëhet edhe më shqetësuese për shkak të raportimeve mbi dënimet me vdekje. Organizatat për të drejtat e njeriut bëjnë me dije se që nga nisja e konfliktit janë ekzekutuar 26 burra të konsideruar si të burgosur politikë, përfshirë persona të lidhur me protestat e viteve 2022 dhe 2024, si dhe me grupe opozitare të ndaluara.
Sipas mediave shtetërore iraniane, gjashtë persona të tjerë janë ekzekutuar me varje për spiunazh në favor të Izrael gjatë së njëjtës periudhë.
Ndërkohë, HRANA raporton për mijëra viktima nga sulmet amerikano-izraelite, mes tyre mbi 1,700 civilë, ndërsa situata në Iran mbetet e tensionuar për shkak të përshkallëzimit ushtarak dhe masave të forta të sigurisë.
