By Irani ende nuk i është përgjigjur zyrtarisht propozimit të paraqitur nga Shtetet e Bashkuara për t’i dhënë fund konfliktit, ndërsa diskutimet mbi tekstin përfundimtar të marrëveshjes po vijojnë në Teheran.
Sipas një burimi pranë ekipit negociator iranian, të cituar nga agjencia Mehr News, autoritetet iraniane po e analizojnë me kujdes ofertën amerikane për shkak të mungesës së besimit ndaj Uashingtonit dhe përvojave të mëparshme, të cilat sipas Teheranit kanë treguar mosrespektim të angazhimeve nga ana e SHBA-së.
Burimi bëri të ditur se procesi i shqyrtimit po zhvillohet në mënyrë të detajuar dhe se Irani synon të sigurojë garanci të qarta dhe të verifikueshme përpara se të marrë një vendim përfundimtar lidhur me marrëveshjen.
“Bazuar në përvojat e kaluara, Irani po kërkon përfitime të prekshme dhe reale”, është shprehur burimi, duke theksuar se Teherani nuk do të mjaftohet me zotime politike, por kërkon mekanizma konkretë që garantojnë zbatimin e çdo marrëveshjeje të arritur.
Zhvillimi vjen në një moment të ndjeshëm për diplomacinë ndërkombëtare, ndërsa përpjekjet për uljen e tensioneve dhe arritjen e një marrëveshjeje të qëndrueshme vazhdojnë. Një dakordësi mes palëve do të mund të krijonte kushtet për ndalimin e përshkallëzimit të konfliktit dhe hapjen e një kapitulli të ri negociatash mbi sigurinë dhe stabilitetin në rajon.
Megjithatë, mbetet e paqartë se kur Irani do të japë një përgjigje zyrtare dhe nëse kërkesat e tij për garanci shtesë do të pranohen nga pala amerikane.
