By Gjermania dhe Polonia, dy vende anëtare të NATO-s, kanë vendosur të thellojnë bashkëpunimin e tyre në fushën e mbrojtjes përmes një marrëveshjeje të re të nënshkruar në Varshavë.
Ministri gjerman i Mbrojtjes Boris Pistorius zhvilloi një vizitë zyrtare në kryeqytetin polak, ku u prit nga homologu i tij Władysław Kosiniak-Kamysz. Takimi u shoqërua me ceremoni ushtarake dhe sinjale të qarta afrimi mes dy vendeve.
Pas rreth një ore bisedimesh, të dy ministrat nënshkruan marrëveshjen që riafirmon bashkëpunimin strategjik në kuadër të NATO-s dhe Bashkimit Evropian, si dhe angazhimin për mbrojtje të ndërsjellë në rast nevoje.
Sipas deklaratave zyrtare, marrëveshja synon forcimin e kapaciteteve ushtarake, zhvillimin e industrisë së mbrojtjes dhe rritjen e bashkëpunimit në fusha si siguria kibernetike, hapësira, kërkimi ushtarak dhe mbrojtja e infrastrukturës kritike.
Të dy vendet gjithashtu kanë planifikuar stërvitje të përbashkëta ushtarake dhe bashkëpunim më të ngushtë në rajonin e Detit Baltik dhe në sigurinë e rrugëve detare.
Polonia, e cila kufizohet me Rusinë dhe Bjellorusinë, ka rritur ndjeshëm shpenzimet për mbrojtjen, duke arritur rreth 5% të PBB-së. Ministri polak theksoi se vendi i tij e sheh kërcënimin kryesor nga lindja dhe kujtoi përvojat historike të vitit 1939, kur Polonia u sulmua nga dy fronte.
Marrëveshja shihet si një hap i rëndësishëm në forcimin e koordinimit ushtarak brenda Evropës dhe në kuadër të sigurisë së përbashkët të NATO-s.
