By Një seri tërmetesh të fuqishme që goditën brenda tetë orësh Kaliforninë veriore, brigjet veriore të Japonisë dhe Venezuelën kanë nxitur spekulime në rrjetet sociale se ngjarjet mund të kenë qenë të lidhura. Megjithatë, sizmologët sqarojnë se bëhet fjalë për një rastësi dhe jo për një fenomen të ndërlidhur.
Fillimisht, një tërmet me magnitudë 5.6 goditi një zonë rurale të Kalifornisë veriore. Pak orë më vonë, një tërmet shumë më i fuqishëm, me magnitudë 7.2, tronditi brigjet veriore të Japonisë. Në të njëjtën periudhë, Venezuela u godit nga dy tërmete të forta që shkaktuan dëme të konsiderueshme dhe mbi 200 viktima.
Sipas William Barnart, ndihmës koordinator i Programit të Rrezikut Sizmik pranë Shërbimit Gjeologjik të SHBA-së (USGS), të gjitha këto lëkundje ndodhën përgjatë kufijve të njohur të pllakave tektonike, por nuk kanë pasur asnjë lidhje shkak-pasojë me njëra-tjetrën.
“Tërmetet ndodhin çdo ditë në të gjithë botën dhe shumica e tyre zhvillohen larg zonave të banuara. Ajo që ndodhi ishte thjesht një ditë e pazakontë, ku disa tërmete të forta u regjistruan në vende ku u ndien nga popullsia,” u shpreh Barnart.
Edhe profesori Martin Hudson nga UCLA theksoi se është jashtëzakonisht e rrallë që një tërmet të shkaktojë një tjetër në distanca prej mijëra kilometrash.
“Nëse analizojmë tërmetet e 100 viteve të fundit, nuk kemi parë raste ku tërmete kaq larg njëri-tjetrit të kenë qenë të lidhur drejtpërdrejt,” deklaroi ai.
Hudson shtoi se ndryshe nga rastet në Kaliforni dhe Japoni, dy tërmetet e fuqishme në Venezuelë mund të kenë qenë të lidhura mes tyre për shkak të afërsisë gjeografike, pasi një çarje tektonike mund të aktivizojë një tjetër në të njëjtën zonë.
Ekspertët kujtojnë se çdo vit regjistrohen dhjetëra tërmete me magnitudë mbi 7 në mbarë botën dhe se ndikimi i tyre varet kryesisht nga afërsia me zonat e banuara. Në rastin e Venezuelës, bilanci i rëndë i viktimave lidhet me faktin se lëkundjet goditën një zonë me dendësi të lartë popullsie.
