By Gjykata Kushtetuese e Maqedonisë së Veriut ka miratuar vendimin për shfuqizimin e emrave të disa rrugëve në Tetovë, të miratuar nga Këshilli Komunal në vitin 2007. Vendimi u mor me pesë vota pro, ndërsa kundër votuan dy gjyqtarët shqiptarë dhe një gjyqtar turk.
Nisma për shqyrtimin e çështjes ishte paraqitur nga Lidhja e Luftëtarëve nga Lufta Nacionalçlirimtare dhe Antifashiste e Maqedonisë 1941–1945. Sipas saj, ndryshimet e emërtimeve ishin bërë pa pëlqimin e Qeverisë, në kundërshtim me ligjin që rregullon emërtimin e rrugëve, shesheve dhe objekteve infrastrukturore.
Në mesin e emrave që preken nga vendimi janë “Iliria”, “Dëshmorët e Kombit”, “Dervish Cara” dhe “Kongresi i Manastirit”, të cilët për një pjesë të shqiptarëve të Tetovës konsiderohen simbole të përfaqësimit më të drejtë të historisë dhe identitetit shqiptar në hapësirën publike pas Marrëveshjes së Ohrit.
Si pasojë e vendimit, disa rrugëve do t’u rikthehen emërtimet e mëparshme. Rrugët “Kongresi i Manastirit”, “Dëshmorët e Kombit” dhe “Krushevska Republika” do të mbajnë sërish emrin e ish-politikanit dhe udhëheqësit ushtarak jugosllav Ivo Lola Ribar. Gjithashtu, emrat e rrugëve “Abdyl Frashëri” dhe “Sami Frashëri” do të zëvendësohen me emërtimet e mëparshme “Lenin” dhe “Radovan Coniq”. Ndërkohë, rruga “Metodija Andonov Çento” do të riemërtohet me emrin e partizanit slloven Boris Kidriç.
Mbështetësit e vendimit argumentojnë se ndryshimet e vitit 2007 janë bërë në kundërshtim me procedurat ligjore dhe se rikthimi i emërtimeve të mëparshme përbën korrigjimin e një procesi të paligjshëm. Në këtë linjë është shprehur edhe Darjan Sotiroski, i cili ka përshëndetur rikthimin e emrave si “Josip Broz Tito”, “Radovan Coniq”, “Ivo Lola Ribar” dhe “29 Nëntori”.
Vendimi ka shkaktuar reagime të forta nga partitë shqiptare. Bashkimi Demokratik për Integrim (BDI) e ka cilësuar atë si pjesë të një fushate kundër arritjeve politike të shqiptarëve, ndërsa deputeti Arbër Ademi e ka quajtur Gjykatën Kushtetuese “destabilizuese” dhe ka paralajmëruar se vendimi përfaqëson një kthim prapa në kohë.
Debati mbi emërtimin e rrugëve në Tetovë vijon të mbetet një çështje me ngarkesë të fortë historike, politike dhe identitare. Vendimi i fundit pritet të thellojë diskutimet mbi mënyrën e përfaqësimit të historisë dhe kujtesës kolektive në hapësirën publike të qytetit.
