By Dasma e këngëtares me famë botërore Dua Lipa me aktorin Callum Turner në Palermo ka shkaktuar reagime nga një pjesë e banorëve vendas, të cilët kanë vendosur postera protestues në rrugët e qytetit për shkak të kufizimeve dhe bllokimeve të vendosura për ceremoninë.
Këngëtarja ka udhëtuar drejt Siçilisë për të festuar martesën me Turner në një ceremoni luksoze, pas celebrimit të mëparshëm të tyre në Londër.
Të premten, në zonën përreth Palazzo Valguarnera Gangi është vërejtur prani e shtuar e forcave të policisë, ndërsa raportohet se disa sheshe kryesore të qytetit janë mbyllur për shkak të festimeve.
Sipas raportimeve të mediave ndërkombëtare, banorëve u është kërkuar gjithashtu të nënshkruajnë marrëveshje konfidencialiteti gjatë zhvillimit të ceremonisë.
Në shenjë kundërshtimi, disa banorë kanë vendosur postera në qendër të Palermos, me mesazhe në italisht dhe anglisht që shprehin pakënaqësi për kufizimet në hapësirat publike.
Mes tyre lexohen slogane si: “Palermo nuk jepet me qira. Hapësirat publike u përkasin të gjithëve”, “Sheshi ynë nuk është salloni juaj” dhe “Palermo nuk është vetëm për të pasurit”.
Ngjarja ka ndezur debat në qytet mbi përdorimin e hapësirave publike për evente private dhe ndikimin e tyre në jetën e përditshme të banorëve.
