By Një nga ngjarjet më të rënda të lidhura me grupimet e tifozëve ultras të Inter Milan në vitet e fundit, vrasja e Vittorio Boiocchi-t, ka marrë zhvillime të reja gjatë dëshmive në gjykatë.
Sipas deklarimeve të dhëna nga i akuzuari Marco Ferdico para Gjykatës së Krimeve të Rënda, konflikti mes anëtarëve të grupit “Curva Nord” ka pasur si pikënisje një situatë të lidhur me një fanellë të lojtarit Alessandro Bastoni, të marrë pas finales së Kupës së Italisë në vitin 2022.
Ferdico ka deklaruar se pas marrjes së fanellës, ai është përjashtuar nga grupi ultras për shkak të mosmarrëveshjeve të brendshme, duke shtuar se kjo çështje ka ndezur tensione që më pas u përshkallëzuan.
Sipas dëshmisë së tij, konflikti brenda grupit është thelluar më tej nga përplasje dhe akuza për tradhti dhe keqmenaxhim të parave, duke përfshirë edhe figura të tjera të ultrasve të përmendur në hetime.
Ferdico ka pretenduar gjithashtu se vendimet dhe konfliktet brenda grupit kanë pasur rol në përshkallëzimin e ngjarjes, duke theksuar se “situata doli jashtë kontrollit”.
Autoritetet italiane po vijojnë hetimet për zbardhjen e plotë të rrethanave të vrasjes dhe për të përcaktuar rolin e secilit prej të përfshirëve në këtë ngjarje të rëndë që tronditi botën e tifozërisë në Itali.
