By Lionel Messi i ka dhënë lamtumirën kombëtares së Argjentinës, duke mbyllur një prej kapitujve më të jashtëzakonshëm në historinë e futbollit ndërkombëtar.
Pas më shumë se dy dekadash me fanellën e “Albicelestes”, mbi 200 ndeshjeve dhe një karriere të mbushur me gola, asistime, trofe dhe momente të paharrueshme, kapiteni argjentinas ka vendosur të tërhiqet nga futbolli ndërkombëtar.
Messi, i cili me Argjentinën ka fituar një Kupë Bote dhe dy Kupa të Amerikës, e ka komunikuar vendimin pas përfundimit të Botërorit 2026, ku skuadra e tij u rendit nënkampione.
“Pas gjithë kësaj kohe që ka kaluar nga finalja, pasi e kam menduar gjatë, dua t’ju komunikoj të gjithëve se tërhiqem nga Kombëtarja. Ishte një vendim që më dhembi dhe vazhdon të më dhembë në shpirt, por e kuptoj se ka ardhur momenti”, shkroi Messi.
Ylli argjentinas theksoi se gjatë gjithë karrierës së tij me kombëtaren ka dhënë gjithçka për fanellën e Argjentinës, pavarësisht rezultateve dhe vështirësive të hasura ndër vite.
“Ju betohem se gjithmonë kam dhënë gjithçka, jo vetëm në vitet e fundit kur fituam gjithçka, por edhe më parë. Gjithmonë kam luftuar dhe jam angazhuar maksimalisht për këtë fanellë, për t’ju dhuruar gëzime dhe për t’ju bërë krenarë që jeni argjentinas, përmes futbollit”, u shpreh kapiteni.
Messi pranoi se largimi nga kombëtarja është një moment i dhimbshëm për të, por theksoi se tashmë ka ardhur koha që hapësirën ta marrë brezi i ri i futbollistëve argjentinas.
“E dua, e kam dashur dhe do ta dua gjithmonë Kombëtaren. Jam bosh, nuk kam më për të dhënë. Për më tepër, pas nesh po vijnë lojtarë shumë të mëdhenj që meritojnë të jenë aty”, shkroi ai.
Pas 21 vitesh nga debutimi me kombëtaren, Messi largohet pasi realizoi thuajse çdo ëndërr që kishte me fanellën e Argjentinës.
Ai udhëhoqi “Albicelestes” drejt triumfit në Kupën e Amerikës, përpara se të kurorëzohej kampion bote dhe më pas të fitonte një tjetër trofe kontinental. Me këto suksese, Messi i dha fund një pritjeje të gjatë të Argjentinës për trofe madhorë dhe e vendosi emrin e tij edhe më thellë në historinë e futbollit të vendit.
Largimi i tij shënon fundin e një epoke për kombëtaren argjentinase dhe për një prej historive më të mëdha individuale në futbollin botëror.
