By Shtetet e Bashkuara kanë kryer sulme të reja ushtarake ndaj Iranit, ndërsa negociatat për t’i dhënë fund luftës tremujore në Lindjen e Mesme vijojnë mes tensioneve të larta.
Sipas një zyrtari amerikan, i cili foli në kushte anonimiteti për agjencinë Reuters, sulmet kishin në shënjestër një strukturë ushtarake iraniane që konsiderohej kërcënim për forcat amerikane dhe anijet tregtare në Ngushticën e Hormuzit.
Burimi bëri të ditur se forcat amerikane kapën dhe rrëzuan disa dronë iranianë, të cilët sipas Uashingtonit përbënin rrezik për njësitë ushtarake dhe trafikun detar në rajon.
Më herët, agjencia iraniane e lajmeve raportoi se tre shpërthime u dëgjuan në lindje të qytetit portual të Bandar Abbas rreth orës 01:30 sipas kohës lokale.
Sipas raportimeve, sistemet e mbrojtjes ajrore iraniane u aktivizuan për disa minuta, ndërsa autoritetet nisën hetime për të përcaktuar origjinën e shpërthimeve. Bandar Abbas, kryeqendra e provincës Hormuzgan, konsiderohet një nga qendrat kryesore të operacioneve ushtarake iraniane në rajonin e Gjirit Persik.
Edhe më herët gjatë kësaj jave, mediat iraniane raportuan shpërthime dhe shkëmbime zjarri në zonë, duke akuzuar ushtrinë amerikane për shkelje të armëpushimit që është në fuqi që nga fillimi i muajit prill.
