By Ylli norvegjez, Erling Haaland, ishte protagonisti kryesor i fitores së Norvegjisë ndaj Brazilit, duke realizuar dy gola që i siguruan kombëtares kualifikimin në çerekfinalet e Kupës së Botës.
Pas sfidës së zhvilluar në New Jersey, festimet vijuan në dhomat e zhveshjes, ku futbollistët morën një vizitë të veçantë nga Princesha Ingrid Alexandra dhe vëllai i saj, Princi Sverre Magnus. Trashëgimtarja e fronit norvegjez përshëndeti lojtarët një nga një dhe përqafoi ngrohtësisht Haalandin, i cili festonte suksesin së bashku me bashkëlojtarët.
22-vjeçarja, e cila renditet e dyta në vijën e trashëgimisë së fronit të Norvegjisë dhe pritet të bëhet monarkja e parë femër e vendit pas më shumë se gjashtë shekujsh, mori pjesë në turne në vend të të atit, Princit të Kurorës Haakon. Ky i fundit anuloi udhëtimin pasi bashkëshortja e tij, Mette-Marit, iu nënshtrua një ndërhyrjeje kirurgjikale.
Vizita në Kupën e Botës përbënte gjithashtu paraqitjen e parë publike zyrtare të Princeshës Ingrid Alexandra pas operacionit të nënës së saj.
Në aspektin sportiv, Haaland vazhdoi formën e tij të shkëlqyer, duke e çuar në shtatë numrin e golave të realizuar në turne dhe duke barazuar Lionel Messi dhe Kylian Mbappé në garën për “Këpucën e Artë”.
“Zakonisht, nëse kam një ose dy raste, ato përfundojnë me gola. Nuk e di si e bëj, por gjithçka ka të bëjë me përqendrimin. Mendoj se është një dhuratë nga Zoti”, deklaroi sulmuesi norvegjez pas ndeshjes.
Haaland u bëri thirrje gjithashtu të rinjve norvegjezë të ndjekin ëndrrën për të përfaqësuar kombëtaren, duke theksuar se veshja e fanellës së Norvegjisë është krenaria më e madhe për çdo futbollist.
Norvegjia do të përballet të shtunën me Anglinë në çerekfinalen që do të zhvillohet në Miami, me synimin për të vijuar rrugëtimin historik në turne.
