By Një gjykatës federal në Shtetet e Bashkuara të Amerikës ka bërë publike një letër të dyshuar të vetëvrasjes së Jeffrey Epstein, dokument që deri më tani ishte mbajtur i fshehtë nga publiku.
Letra, e paverifikuar dhe pa datë, u përfshi në dosjen gjyqësore të ish-shokut të qelisë së tij, Nicholas Tartaglione. Ky i fundit pretendon se e kishte gjetur dokumentin pas tentativës së parë për vetëvrasje të Epstein në korrik të vitit 2019.
Në përmbajtjen e letrës shkruhet: “Më hetuan për muaj të tërë – nuk gjetën ASGJË!!!”, si dhe: “Është privilegj të zgjedhësh kohën për të thënë lamtumirë. Pa argëtim, nuk ia vlen”.
Jeffrey Epstein u gjet i vdekur në qelinë e tij në Manhattan disa javë më vonë, ndërsa priste gjyqin për akuza të trafikut seksual. Mjekësia ligjore e cilësoi vdekjen si vetëvrasje.
Sipas raportimeve të The New York Times, letra ishte mbajtur e fshehtë për gati shtatë vite. Ndërkohë, Departamenti i Drejtësisë i SHBA deklaroi se nuk mund të konfirmojë autenticitetin e dokumentit, por nuk kundërshtoi publikimin e tij.
Nicholas Tartaglione pretendon se ai i dha ndihmën e parë Epstein pas tentativës së parë për vetëvrasje dhe se ekspertë të shkrimit të dorës kanë verifikuar letrën.
