By Klubi i Egnatias ka zyrtarizuar rikthimin e mbrojtësit Alessandro Kacbufi, një emër i njohur për rrogozhinasit, i cili ribashkohet me skuadrën pas tre vitesh largimi.
Kacbufi ka qenë pjesë e ekipit në sezonin historik kur Egnatia Rrogozhinë fitoi për herë të parë Kupën e Shqipërisë, duke lënë gjurmë në atë sukses të rëndësishëm për klubin.
Pas largimit nga Egnatia, qendërmbrojtësi ka vijuar karrierën e tij te Erzeni, Flamurtari dhe së fundmi Kastrioti, përpara se të rikthehej sërish në Rrogozhinë.
Në njoftimin zyrtar, klubi e ka mirëpritur me entuziazëm rikthimin e tij:
“Me shumë kënaqësi mirëpresim sërish në familjen e Egnatias Alessandro Kacbufin, një emër i njohur për klubin dhe tifozët tanë. Mirë se u riktheve në shtëpi!”, thuhej në komunikatën e klubit.
Rikthimi i Kacbufit shihet si një shtesë e rëndësishme për repartin e mbrojtjes, teksa Egnatia vijon përgatitjet për sfidat e ardhshme të sezonit.
