By Deputetja Marjana Koçeku ka reaguar sërish pas vendimit për t’u larguar nga Grupi Parlamentar i Partisë Socialiste dhe për t’u deklaruar si deputete e pavarur.
Në një postim në rrjetet sociale, Koçeku ka publikuar një foto nga kisha, të shoqëruar me një mesazh ku shkruan:
“Zot më jep forcë, besim të drejtë e shpresë të sigurtë. Mos na e kurse si popull frymën e urtisë, dhe të kuptimësisë, që kurrë mos të largohena drejt rrugëve t’humbuna”.
Vendimi i saj për të dalë si deputete e pavarur është bërë publik një ditë më parë përmes një postimi në rrjetet sociale, ku ajo theksoi se idealet dhe vlerat e saj kanë qenë të pandryshuara dhe se ato i përcaktojnë kufijtë e saj politikë.
“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojne kufijtë”, shkroi ajo.
Më herët gjatë ditës, Koçeku, e njohur edhe si “Neomalësorja”, publikoi në rrjete sociale një foto të një flamingoje.
Ndërkohë, protesta e qytetarëve, e cila ka hyrë në ditën e 16-të dhe është quajtur “Revolucioni Flamingo”, ka nisur fillimisht si kundërshtim ndaj projektit në zonën e Zvërnecit, por më pas është zgjeruar me kërkesa më të gjera politike dhe sociale.
