By Sistemi i “Final 4” në futbollin shqiptar duket se ka mbërritur në fundin e tij, pasi pritet të mos jetë më pjesë e formatit të Kategoria Superiore në sezonet e ardhshme.
Burime pranë Federata Shqiptare e Futbollit bëjnë me dije se vendimi është marrë pas analizave të zhvilluara gjatë tre sezoneve të fundit, ku janë evidentuar disa problematika të lidhura me këtë formulë të re të fazës finale të kampionatit.
Një nga arsyet kryesore për heqjen e sistemit lidhet me pjesëmarrjen e ulët të tifozëve në ndeshjet vendimtare, pavarësisht rëndësisë së tyre për përcaktimin e kampionit. Po ashtu, “Final 4” është shoqëruar me debate të vazhdueshme mbi drejtësinë sportive, pasi një skuadër që dominon gjatë gjithë sezonit të rregullt mund të humbasë titullin në vetëm disa ndeshje finale.
Sistemi ka sjellë gjithashtu pakënaqësi te klubet dhe ka prodhuar rezultate të papritura, ndërsa mungesa e ekipeve të kryeqytetit në disa edicione ka ndikuar negativisht në interesin e publikut dhe të tregut.
Sipas burimeve, modeli aktual është konsideruar si një eksperiment i dështuar, dhe drejtuesit e federatës po shqyrtojnë rikthimin te formati klasik i kampionatit me 36 javë, ku skuadra që grumbullon më shumë pikë shpallet automatikisht kampione.
Një alternativë tjetër që po diskutohet është një format i ndërmjetëm me më pak javë dhe me ndarje të skuadrave në fazën finale sipas renditjes në tabelë.
Vendimi përfundimtar pritet të merret në javët e ardhshme, por sinjalet aktuale tregojnë se sezoni i ri i Kategoria Superiore do të zhvillohet pa “Final 4”, duke mbyllur kështu një nga eksperimentet më të diskutueshme të futbollit shqiptar.
