By Kombëtarja gjermane ka marrë një goditje të rëndë vetëm pak ditë para nisjes së Kupës së Botës, pasi talenti Lenart Karl është konfirmuar se do të mungojë në turne për shkak të një dëmtimi serioz.
Sulmuesi pësoi një këputje muskulore në pjesën e përparme të kofshës së majtë gjatë seancës së fundit stërvitore përpara ndeshjes provë kundër SHBA-së. Dëmtimi u konfirmua edhe nga rezonanca magnetike (MRI), duke i dhënë fund shpresave të tij për pjesëmarrje në turneun e parë madhor të karrierës.
Në një deklaratë emocionale në rrjetet sociale, Karl shprehu zhgënjimin e madh për mungesën në Botëror, duke theksuar se kishte bërë gjithçka për të qenë gati, por fatkeqësisht dëmtimet ndodhin në momentet më të këqija.
Federata Gjermane e Futbollit (DFB) njoftoi zyrtarisht largimin e tij nga skuadra, ndërsa vendin e tij në listën e të grumbulluarve e ka marrë Asan Ouedraogo, talenti i RB Leipzig.
Trajneri Julian Nagelsmann e ka vlerësuar Ouedraogon si një lojtar “jashtëzakonisht të talentuar”, duke i kërkuar të luajë me guxim dhe pa frikë, në një moment të rëndësishëm për kombëtaren.
Karl ndërkohë do ta ndjekë Botërorin si spektator, por ka shprehur mbështetjen e tij të plotë për ekipin gjerman, duke i uruar sukses në turne. Ai gjithashtu është zotuar se do të rikthehet më i fortë pas këtij momenti të vështirë.
