By Trajneri italian Antonio Conte duket se ka vendosur t’i japë fund aventurës së tij me SSC Napoli në fund të sezonit.
Pas ndeshjes kundër Pisa Sporting Club, ku siguroi për Napolin një biletë në UEFA Champions League, Conte deklaroi se presidenti e di tashmë vendimin e tij dhe se kjo çështje ishte diskutuar prej një muaji.
Mediat italiane raportojnë se mes Contes dhe Napolit gjithçka ka përfunduar, pavarësisht se tekniku ishte nën kontratë deri në vitin 2027. Sipas raportimeve, Conte i qëndron traditës së tij për të mos qëndruar më shumë se dy sezone në krye të një skuadre.
Ndryshe nga largime të tjera të bujshme në të kaluarën, këtë herë ndarja pritet të bëhet në mënyrë paqësore dhe me konsensus me presidentin e klubit, Aurelio De Laurentiis. Vetë De Laurentiis kishte deklaruar më herët se nuk do të bëhej pengesë nëse Conte dëshironte largimin.
Divorci mes Contes dhe Napolit pritet të zyrtarizohet pas sfidës kundër Udinese Calcio, e fundit për sezonin në Serie A.
Gjatë periudhës së tij në stol, Conte regjistroi 53 fitore, 19 barazime dhe 18 humbje, duke i dhuruar Napolit një titull kampion në Serie A dhe trofeun e Superkupës.
Raportohet se një nga arsyet kryesore të largimit lidhet me strategjinë e klubit për sezonin e ri, pasi De Laurentiis nuk planifikon investime të mëdha dhe synon uljen e shpenzimeve. Napoli aktualisht renditet si klubi i tretë në Serie A për pagat, me rreth 110 milionë euro në sezon.
Ndërkohë, drejtuesit e Napolit kanë nisur kërkimet për pasuesin e Contes, ku në listë përmenden emra si Raffaele Palladino, Fabio Grosso, Maurizio Sarri dhe Massimiliano Allegri.
