By Anija turistike MV Hondius, e prekur nga një shpërthim i dyshuar i Hantavirus, pritet të mbërrijë brenda tri ditësh në ishullin Tenerife, ndërsa evakuimi i pasagjerëve do të nisë më 11 maj.
Lajmi është konfirmuar nga autoritetet në Spanjë, të cilat bëjnë me dije se anija do të ankorohet në portin e Granadillës, ku do të ngrihet një sistem i përbashkët për vlerësimin shëndetësor dhe organizimin e riatdhesimit të pasagjerëve.
Ministrja e Shëndetësisë, Mónica García, deklaroi se të gjithë pasagjerët do të qëndrojnë në bord deri në mbërritjen e avionëve përkatës, përveç rasteve kur gjendja e tyre shëndetësore kërkon ndërhyrje të menjëhershme.
Sipas burimeve nga Ministria e Brendshme, vendet e Bashkimi Evropian do të organizojnë riatdhesimin e qytetarëve të tyre, ndërsa Komisioni Evropian do të ndërhyjë në rastet kur shtetet nuk janë në gjendje ta bëjnë këtë. Ndërkohë, evakuimi i qytetarëve nga vendet jashtë BE-së është ende në fazë planifikimi.
Në bordin e MV Hondius ndodhen edhe 14 shtetas spanjollë, përfshirë një anëtar të ekuipazhit, të cilët do të transferohen në Spitali Ushtarak Gómez Ulla për trajtim të specializuar.
Ngjarja ka shkaktuar tensione edhe në nivel rajonal. Kreu i qeverisë së Ishujve Kanarie, Fernando Clavijo, kishte shprehur më herët kundërshtimin për evakuimin në arkipelag, duke përmendur mungesë informacioni nga autoritetet qendrore. Megjithatë, ministrja García theksoi se ka pasur komunikim të vazhdueshëm dhe koordinim me autoritetet lokale.
Autoritetet shëndetësore vijojnë monitorimin e situatës, ndërsa pritet që operacioni i evakuimit të zhvillohet në kushte të rrepta sigurie për të shmangur përhapjen e mëtejshme të virusit.
