By Federata Shqiptare e Futbollit ka bërë publike vendimet e Komisionit të Disiplinës dhe Etikës, ku në fokus janë disa klube të Superiores dhe kategorive të tjera që kanë detyrime financiare të pashlyera.
Sipas vendimeve të bëra publike, KF Tirana është ndëshkuar me bllokim të federimit të lojtarëve të rinj deri në shlyerjen e detyrimeve të mbetura. Një masë e ngjashme është marrë edhe ndaj KF Kukësi.
Ndërkohë, klubi bardheblu ka gjithashtu një çështje të hapur me portierin Romeo Harizaj, për të cilin është vendosur një afat 30-ditor për zgjidhjen e detyrimeve financiare.
Në vendimet e Komisionit përmendet edhe KF Vllaznia, e cila është e detyruar të shlyejë detyrimet ndaj futbollistit Liridon Latifi brenda afateve të përcaktuara.
Po ashtu, KF Besa Kavajë është paralajmëruar për shlyerjen e detyrimeve ndaj trajnerit Emiljano Çela dhe ish-lojtarit Bekim Kuli.
Vendimet e Komisionit të Disiplinës vijnë si pjesë e monitorimit të vazhdueshëm të detyrimeve kontraktuale në futbollin shqiptar, me qëllim garantimin e rregullit financiar dhe respektimin e kontratave profesionale.
