By Izraeli dhe Libani kanë arritur një marrëveshje armëpushimi, e cila parashikon ndërprerjen e veprimeve ushtarake mes palëve, me kusht që grupi Hezbollah të ndalojë sulmet ndaj territorit izraelit. Lajmi është bërë i ditur nga Departamenti Amerikan i Shtetit (DASH).
Sipas informacioneve paraprake, marrëveshja synon uljen e tensioneve në kufirin mes dy vendeve dhe krijimin e një klime më të favorshme për vazhdimin e përpjekjeve diplomatike në rajon.
Armëpushimi pritet të hyjë në fuqi me respektimin e angazhimeve nga të gjitha palët, ndërsa ndalimi i sulmeve nga ana e Hezbollahut konsiderohet një nga kushtet kryesore për funksionimin e marrëveshjes.
Burime diplomatike bëjnë me dije se përfaqësues të Izraelit dhe Libanit do të zhvillojnë një takim të ri më 22 qershor, ku do të diskutohen mekanizmat e zbatimit të armëpushimit dhe hapat e mëtejshëm për garantimin e stabilitetit dhe sigurisë në rajon.
Komuniteti ndërkombëtar ka mirëpritur zhvillimin, duke e konsideruar atë një hap pozitiv drejt shmangies së përshkallëzimit të mëtejshëm të konfliktit në Lindjen e Mesme.
