By UEFA Champions League nuk përfaqëson vetëm fitime financiare për AC Milan, por mbi të gjitha prestigj dhe forcë tërheqëse në merkato. Drejtuesit kuqezi duket se kanë nisur ndërtimin e një projekti ambicioz për sezonin e ardhshëm, me synimin për ta rikthyer Milanin mes elitës europiane.
Objektivi kryesor i merkatos është Leon Goretzka. Mesfushori i Bayern Munich pritet të largohet në fund të sezonit dhe, sipas raportimeve nga Italia, ka arritur një marrëveshje paraprake me Milanin për një kontratë trevjeçare me pagë rreth 5 milionë euro në sezon.
Raportohet gjithashtu se Goretzka ka zhvilluar një bisedë telefonike me Massimiliano Allegri, një sinjal i qartë se trajneri italian po ndërton personalisht projektin e ri të skuadrës.
Allegri kërkon futbollistë me eksperiencë ndërkombëtare dhe mentalitet fitues, ndërsa profili i Goretzkës përshtatet perfekt me këtë ide. Gjermani vjen me një karrierë të pasur me trofe, përfshirë Champions League dhe disa tituj në Bundesliga me Bayern Munich.
Ideja e Milanit është të ndërtojë një repart mesfushe me eksperiencë dhe cilësi, ku pjesë e projektit mund të jenë edhe Adrien Rabiot dhe Luka Modrić. Një treshe me Rabiot, Modriç dhe Goretzka do ta kthente mesfushën kuqezi në një nga më konkurrueset në Serie A.
Ndërkohë, drejtuesit e Milanit janë të gatshëm të aktivizojnë klauzolën për zgjatjen edhe me një vit të kontratës së Luka Modriç. Kroati konsiderohet një nga liderët absolutë të skuadrës, si për eksperiencën ashtu edhe për ndikimin në fushë.
Për veteranin kroat, ideja për ta mbyllur karrierën me fanellën e Milanit në Champions League mbetet një objektiv me domethënie të veçantë, duke qenë se ai është rritur duke admiruar sukseset historike të kuqezinjve në Europë.
